Doğrudan da mö'minlər nicat tapdılar.

(Mö'minlər) namazlarında təvazökar olanlar;

Boş şeylərdən üz döndərənlər;

Zəkat verənlər;

Şəhvətlərini qoruyub saxlayandırlar.

Fəqət zövcələri və malik olduqları kənizlər müstəsnadır. Onlar buna görə əsla qınanmazlar.

Hər kəs bundan artığını istəsə, əslində onlar həddi aşanlardır.

Həm də əmanətlərinə və əhd-peymanlarına riayət edəndirlər.

Və namazlarına diqqət edənlərdir.

Onlar özləri varislərdir.

Onlar firdövsi(bərin bağına) varis olub orada əbədi qalanlardırlar.

Şübhəsiz ki, Biz insanı palçıqdan süzülmüş (sudan) yaratdıq.

Sonra onu nütfə halında möhkəm bir yerdə yerləşdirdik.

Sonra o nütfəni laxtalanmış qan (ələqə) şəklinə saldıq və sonra ələqəni müzğə (bir parça ǝt) şəklinə saldıq, sonra o bir parça əti sümüklərə döndərdik və sonra sümükləri ətlə örtdük və nəhayət, onu bambaşqa bir varlıq olaraq yaratdıq. Yaradanların lap gözəli olan Allaha afərinlər olsun.

Sonra, siz bundan sonra ölməlisiniz.

Sonra, siz qiyamət günü təzədən diriləcəksiniz.

Doğrudan da Biz sizin üstünüzdə yeddi (göy) yolu yaratdıq və yaradılanlardan heç bir şəkildə qafil deyildik.

Və göydən (müəyyən) miqdarda yağış göndərdik və onu yerdə yerləşdirdik. Biz onu (aradan) aparmağa da sözsüz ki, qadirik.

Sizin üçün onunla xurma və üzüm bağları yaratdıq ki, sizin üçün orada bollu meyvələr vardır və onlardan yeyirsiniz.

Vǝ Tur-Sinadan bir ağac çıxır ki, yağ gətirir və yeyənlər üçün bir yavanlıqdır.

Həqiqətən, mal-davarda sizin üçün bir ibrət vardır. Onların qarınlarında olan süddən sizə içirdirik. Sizin üçün onlarda daha çox mənfəətlər vardır və onlardan yeyirsiniz.

Onlara və gəmilərə minirsiniz.

Şübhəsiz ki, Biz Nuhu öz qövmünə tərəf göndərdik. (Onlara) dedi: “Ey mənim qövmüm! Allaha ibadət edin! Sizin üçün ondan başqa bir tanrı yoxdur. Heç qorxmursunuzmu?”

Onun qövmünün kafir olan ǝ'yanları dedilər: “Bu, sizin kimi bir bəşərdən qeyri bir şey deyildir. Sizə böyüklük etmək istəyir. Əgər Allah istəsəydi, mələklər göndərərdi. Biz ata-babalarımızdan belə bir (şey) eşitməmişik”.

“Bu, ancaq dəli olan bir kişidir. Hələ bir neçə müddət gözləyin!”

(Nuh) dedi: “Pərvərdigara! Onların məni təkzib etmələrinə qarşı mənə kömək et!”

Biz isə ona vəhy etdik: “Bizim nəzarətimiz altında və Bizim vəhyimizlə gəmini düzəlt!” Nəhayət, əmrimiz gəldi və təndir (sular) qaynayıb coşdu. (Dedik: Hər heyvandan iki qoşa - biri er- kak va biri dişi heyvan) və əleyhinə hökm verilmiş olanlardan qeyri qalan ailə üzvlərini də gəmiyə mindir! Zülm edənlər barəsində mənimlə danışma! Onlar boğu- lacaqlar”.

Sən və sənin yanındakılar gəmiyə mindikdə de: “Həmd olsun o Allaha ki, bizi zalım qövmdən qurtardı”.

Vǝ de: “Pərvərdigara! Məni bərəkətli bir düşərgəyə endir! Çünki sən nazil edənlərin lap yaxşısısan”.

Həqiqətən, bunda ibrətlər vardır və şübhəsiz ki, Biz imtahan edənlərik.

Sonra onların ardınca ayrı bir nəsil yaratdıq.

Və özlərindən onlara bir peyğəmbər göndərdik ki, (desin:) "Allaha ibadət edin! Ondan başqa sizin üçün bir tanrı yoxdur. Heç qorxmursunuzmu?"

Qövmünün kafir olan, axirət görüşünü danan və dünya həyatında (quduracaqları qədər) bol ne'mət verdiyimiz ə'yanları dedilər: “Bu, ancaq sizin kimi bir bəşərdir. Sizin yediyinizdən yeyir və sizin içdiyinizdən içir”.

“Və əgər özünüz kimi bir bəşərə itaət etsəniz, onda ziyankarlardan olacaqsınız”.

"O, sizə ölüb toz-torpaq və sür-sümük olduqdan sonra (təzədən dirilib qəbirdən) çıxacağınızı və'də verirmi?!"

"Pah! Vǝ'də verildiyiniz şey çox uzaqdır!"

"Bizim bu dünya həyatımızdan qeyri bir şey yoxdur, (bə'zimiz) ölürük, (bə'zimiz isə) yaşayırıq və bir daha dirilməyəcəyik".

“Bu ancaq Allaha yalan-iftira qoşan bir adamdır. Biz ona iman gətirən deyilik”.

Dedi: “Pərvərdigara! Onların məni təkzib etmələrinə qarşı mənə kömək et!”

Buyurdu: “Bir azdan sonra bərk peşman olacaqlar”.

Nəhayət, haqq olaraq qorxunc bir gurultu onları yaxaladı. Biz onları çör-çöpə döndərdik. (Qoy) zülmkarlar (Allahın rəhmətindən) uzaq olsunlar.

Sonra onların dalınca ayrı nəsillər yaratdıq.

Heç bir ümmət, əcəlindən qabağa keçə bilməz, dala da qala bilməz.

Sonra biz peyğəmbərlərimizi bir-birinin dalınca göndərdik. Hər bir ümmətə öz peyğəmbərləri gəldikdə onu təkzib etdilər. Biz də onları bir-birinin dalınca gətirdik və onları ibrət vəsiləsi etdik. (Qoy) iman gətirməyənlər (Allahın rəhmətindən) uzaq olsunlar.

Sonra Musa və qardaşı Harunu öz ayələrimiz və açıq-aydın dəlil ilə göndərdik.

Fir'on və onun ǝ'yanlarına tərəf (göndərdik). Onlar təkəbbürlülük etdilər. Onlar özünü üstün bilən qövm idilər.

Dedilər: "Bizim kimi olan və qövmləri bizim qullarımız olan iki bəşərəmi (adama) iman gətirək?"

Nəhayət, onların ikisini də yalançı hesab etdilər və nəticədə həlak olanlardan oldular.

Şübhəsiz ki, biz Musaya səmavi kitabı verdik ki, bəlkə onlar doğru yola yönələlər.

Məryəmin oğlunu və anasını bir nişanə etdik. Onları məhsullu və axar sulu bir abad yerdə yerləşdirdik.

Ey peyğəmbərlər! Pak şeylərdən yeyin və saleh əməllər edin! Mən, həqiqətən, sizin etdiklərinizi yaxşı bilirəm.

Və həqiqətən, bu, sizin ümmətinizdir ki, bütöv bir ümmətdir və Mən sizin Rəbbinizəm, Məndən qorxun!

Nəhayət, dinlərini aralarında parçalayıb bölük-bölük oldular. Hər bölük öz yanındakına (öz dinina) tabe olurdu.

Onları bir müddət öz azğınlıqları içində burax!

Belə hesab edirlərmi ki, onlara verdiyimiz mal və övladla,

Biz onların xeyrinə tələsirik? Xeyr! Onlar anlamırlar.

O kəslər ki, həqiqətən, rəblərinin qorxusundan vahimədədirlər.

Onlar rəblərinin ayələrinə iman gətirənlərdir.

Rəblərinə şərik qoşmayanlardırlar.

(Allah tərəfindən) verildiklərini (Allah yolunda) verənlər, ürəkləri qorxu halında olanlardırlar və (bilirlər) ki, rəblərinə tərəf qayıtmalıdırlar.

Onlardırlar ki, xeyir işlərə tələsirlər və bu işlərdə qabaqcıldırlar.

Biz heç bir kəsi gücündən artıq vəzifələndirmərik. Yanımızda açıqlayan bir kitab var və onlara əsla haqsızlıq olmaz.

Onların qəlbləri bundan qəflətdədir. Onların bundan qeyri də (pis) əməlləri vardır ki, onlar o əməllərə alışmışlar.

Onların rifah içində yaşayanlarını əzabla yaxaladığımız zaman, çığır-bağır salacaqlar.

Bu gün yalvarıb-yaxarmayın! Çünki bizim tərəfdən kömək olunmayacaqsınız.

Ayələrimiz sizə oxunurdu və siz dabanlarınız üstə geri qayıdırdınız.

Bir halda ki, ona fəxr satırdınız və gecə vaxtı (bir yerə yığılıb) hədyan söyləyirdiniz.

Məgər bu sözün (Qur'anın) barəsində düşünmürlərmi? Ya onlar üçün ata-babalarına gəlməyən bir şey gəlmişdirmi?

Və ya öz peyğəmbərlərini (düzgün) tanımayıb, onu inkar edirlərmi?

Yoxsa deyirlər ki: “Onda divanəlik vardır?” (Yox!) O, onlara haqqı gətirdi, (lakin) onların çoxu haqqı xoşlamırlar.

Əgər haqq onların həvavü-həvəslərinə tabe olsaydı; göylər, yer və onlarda olanlar mütləq aradan gedərdi. Yox! Biz onlara zikrlərini (Qur'anı) verdik, lakin onlar öz zikrlərindən üz döndərirlər.

Yoxsa sən onlardan bir xərc (muzd) istəyirsənmi? Rəbbinin xərcliyi daha xeyirlidir və o, ruzi verənlərin daha yaxşısıdır.

Həqiqətən, sən onları doğru yola çağırırsan.

Həqiqətən, axirətə iman gətirməyənlər doğru yoldan mütləq dönərlər.

Onlara mərhəmət etsək, sıxıntılarını aradan aparsaq belə, onlar yenə öz azğınlıqlarında batıb qalacaqlar.

Həqiqətən, onları əzaba düçar etdik, (lakin) onlar rəblərinə boyun əymədilər və yalvarıb-yaxarmırlar.

Üzlərinə şiddətli bir əzab qapısı açdığımız zaman, mə'yus olub heyran qalırlar.

Sizin üçün qulaq, göz və ürək yaradan Odur. Siz nə qədər də az şükr edirsiniz.

Sizi yer üzündə yaradıb yayan da Odur və Ona tərǝf məhşur olacaqsınız.

Sizə həyat verən və öldürən də Odur. Gecə və gündüzün azalıb-çoxalması (bir-birinin dalınca gəlib getməsi) də Ona aiddir. Heç düşünmürsünüzmü?

Onlar da əvvəlkilərin söylədikləri kimi söylədilər.

Dedilər: "Biz öldükdən, toz-torpaq və sür-sümük olduqdan sonra təzədən diriləcəyikmi?"

“Bizə də və bizdən əvvəl atalarımıza da bu və'də verilmişdir. Bu, qədimkilərin əfsanələrindən qeyri bir şey deyildir”.

(Ya Muhəmməd!) De: "Əgər bilirsiniz (deyin görək) yer üzü və yer üzündə olanlar kimə məxsusdur?"

Deyəcəklər: “Allaha”. De: “Heç ibrət almırsınızmı?”

De: “Yeddi qat göylərin Rəbbi və böyük ərşin Rəbbi kimdir?”

Deyəcəklər: “Allahdır”. De: “Heç qorxmursunuzmu?”

De: “Əgər bilirsinizsə, (deyin görǝk) hər şeyin hökmranlığı əlində olan, hər şeyə pənah verən, özü isə heç pənaha möhtac olmayan kimdir?”

Deyəcəklər: “Allahdır”. De: “Bəs niyə aldanırsınız?”

Yox! Biz onlara haqqı gətirdik. Şübhəsiz ki, onlar yalançılardırlar.

Allah ǝsla övlad götürməmişdir və Onunla bərabər heç bir tanrı yoxdur. Əgər belə olsaydı, onda hər tanri öz yaratdığını götürüb gedərdi və bə'ziləri bə'zilərinə üstün gəlmək istərdi. Allah onların tövsif etdiklərindən pak və müqəddəsdir.

O, qeybi də, aşkarı da bilir. (Allah) onların şərik qoşduqlarından daha ucadır.

De: “Pərvərdigara! Məgər onlara və'də verdiyin əzabı mənə göstərəcəksən".

“Pərvərdigara! Onda məni zalım qövmün arasında qoyma!”

Biz onlara və'də verdiyimiz əzabı sənə göstərməyə, əlbəttə, qadirik.

Sən pisliyi yaxşılıqla dəf et! Biz onların vəsf etdiklərini daha yaxşı bilirik.

Vǝ de: “Pərvərdigara! Şeytanların vəsvəsəsindən sənə sığınıram”.

“Pərvərdigara! Onların mənim yanımda hazır olmalarından da sənə sığınıram”.

Nəhayət, onların birinə ölüm gəlib çatanda deyər: “Pǝrvərdigara! Məni təzədən (dünyaya) qaytar!”

Ki, yerinə yetirmədiyim saleh (gərəkən) işləri yerinə yetirim”. Yox! Bu, onun dediyi boş sözdür. Təzədən dirilən günə qədər onların gələcəklərində bərzəx (böyük manea) vardır.

Sur çalındığı zaman, artıq aralarında nə qohumluq olar, nə də bir-birindən hal-əhval tutarlar.

Məhz əməl tərəziləri ağır gələnlər nicat taparlar.

Əməl tərəziləri yüngül gələnlər isə özlərinə ziyan vurmuş kimsələrdir ki, cəhənnəmdə daimi olaraq qalacaqlar.

Od onların üzünü qarsar, onlar orada (yanıb-qovrulub, qorxunc və) çirkin üzlü olarlar.

Məgər mənim ayələrim sizə oxunmurdu və siz (həmişə) onu təkzib etmirdinizmi?

Deyərlər: “Pərvərdigara! Üsyankarlığımız bizə güc gəldi və biz haqq yoldan azan bir qövm idik”.

“Pərvərdigara! Bizi buradan çıxart! Əgər yenə də (əvvəlki halımıza dönsǝk, o zaman biz zalım kimsələrik”.

(Allah) buyurar: "İtilin! Orada susun və mənimlə danışmayın!"

Həqiqətən, mənim bəndələrimdən bir dəstə deyirdilər: "Pərvərdigara! İman gətirdik; bizi bağışla və bizə rəhm elə! Sən rəhm edənlərin daha yaxşısısan".

Və siz onları lağa qoyurdunuz, nəhayət, (bu işiniz) məni yada salmağı sizə unutdurmuşdu və siz onlara gülürdünüz.

Mən də bu gün onlara səbr etdiklərinə görə ǝcr verdim. Bəli, səadətə çatanlar bunlardırlar.

(Allah qiyamətdə) buyurar: “Yer üzündə say baxımından nə qədər qaldınız?”

Deyərlər: “Bir gün və ya bir günün bir azı qədər qaldıq. Bunu sayanlardan soruş!”

Buyurar: “Çox az bir zaman qaldınız. Kaş ki bunu biləydiniz”.

Elə güman edirdiniz ki, sizi əbəs yerə yaratmışıq? Və bizim yanımıza qayıtmayacaqsınız?!

Həqiqi hökmdar olan Allah (hər şeydən) ucadır. Ondan qeyri heç bir tanrı yoxdur. O, şərəfi böyük olan ərşin Rəbbidir.

Hər kəs Allahla bərabər dəlilsiz ayrı bir tanrıya ibadət edərsə; onun hesabı (cəzası) Rəbbinin yanındadır. Qət'ən kafirlər nicat tapmayacaqlar.

Və de: “Pərvərdigara! Bağışla və rəhm elə! Çünki sən rəhm edənlərin daha yaxşısısan”.