Əlif, lam, ra. Bu(nlar səmavi) kitab (olan) açıq-aydın Qur'anın ayələridir.

Bir çox kafirlər (o gün) müsəlmanlığı arzu edərlər.

Qoy yesinlər, kef çəksinlər və (uzun) arzuları başlarını qatsın. Tezliklə bilərlər.

Həlak etdiyimiz heç bir şəhər yoxdur ki, onun bəlli bir əcəli olmasın.

Heç bir ümmət əcəlindən qabağa keçə bilməz, dala da qala bilməz.

Və dedilər: "Ey özünə Qur'an nazil olan kimsə! Doğrudan da sən divanəsən".

"Əgər düz deyirsənsə, nə üçün mələkləri bizim yanımıza gətirmirsən?"

Mələkləri Biz ancaq haqq olaraq nazil edərik, o vaxt daha möhlət verilməzlər.

Şübhəsiz ki, Biz bu Qur'ani nazil etmişik, sözsüz ki, onu qoruyub-saxlayacağıq.

Həqiqətən, Biz səndən əvvəl (da) qabaqkı ümmətlərə (peyğəmbərlər) göndərmişik.

Onlara heç bir peyğəmbər gəlmədi ki, ona istehza etməsinlər.

Biz onu günahkarların qəlbinə belə yeridərik.

Ona iman gətirməzlər. Keçmişlərin də adət-ənənələri belə idi.

Və əgər göydən onlara bir qapı açsaydıq ki, oradan göylərə çıxsaydılar;

Yenə də deyərdilər ki: "Gözümüz bağlanmışdır. Əslində biz ovsunlanmış bir qövmük".

Biz göydə bürclər yaratdıq və onları baxanlar üçün bəzədik.

Və onları hər bir qovulmuş şeytandan qoruduq.

Lakin xəlvəti qulaq asan kimsəni aşkarcasına axan bir ulduz tə'qib edər.

Və yeri döşədik, orada möhkəm dağlar yerləşdirdik və hər şeydən müəyyən ölçüdə (lazımi qədər) göyərtdik.

Sizin üçün və sizin ruzi verəsi olmadığınız kəslər üçün lazım olan yaşayış vəsaiti yaratdıq.

Elə bir şey yoxdur ki, onun xəzinələri Bizdə olmasın və Biz onu bəlli bir ölçüdə nazil edərik.

Və yelləri mayalandıran (tozlandıran) olaraq göndərdik, göydən yağmur nazil etdik və onunla sizi suvardıq. Bir halda ki, siz onu yığıb saxlayan deyilsiniz.

Heç şübhəsiz ki, dirildən də, öldürən də Bizik və (ǝsl) varis də Bizik.

Şübhəsiz ki, sizdən əvvəl gəlib-gedənləri də tanıyırıq, sizdən sonra gələnləri də tanıyırıq.

Həqiqətən, sənin Rəbbin onları bir yerə yığacaq. O, həqiqətən, hikmət sahibidir və biləndir.

Doğrudan da insanı qurumuş və qoxumuş qara palçıqdan yaratdıq.

Və ondan əvvəl cini də alovdan düşmüş oddan yaratdıq.

(Vǝ xatırla) bir zaman sənin Rəbbin mələklərə dedi: "Mən bəşəri qurumuş və qoxumuş qara palçıqdan yaradacağam!"

Mən onu düzəldib yaraşdırdıqda Öz ruhumdan ona üfürdüyüm zaman siz ona səcdə edin.

Mələklər hamısı birlikdə ona səcdə etdilər.

İblisdən savayı. O, səcdə edənlərlə birlikdə olmaqdan imtina etdi.

Buyurdu: "Ey İblis! Sənə nə olub ki, səcdə edənlərlə birlikdə olmayasan?"

Dedi: "Mən quru, qoxumuş qara palçıqdan yaratdığın bəşərə səcdə edən deyiləm".

Buyurdu: "Buradan çıx! Sǝn (dərgahımdan) qovulmuşsan".

"Və cəza gününə kimi sən lə'nətlənmişsən".

Dedi: "Pərvərdigara! Mənə insanların (yenidən) diriləcəkləri günə qədər möhlət ver!"

Buyurdu: "Sən möhlət verilənlərdənsən".

"Mǝ'lum vaxtın gününə qədər".

Dedi: "Pərvərdigara! Məni (bu hökmünün səbəbi ilə) azdırdığına görə, yer üzündə (insanlara günahlarını) bəzəkli göstərib hamısını azdıracağam".

"Təkcə sənin sadiq bəndələrindən savayı".

Buyurdu: "Bu mənə sarı doğru yoldur".

"Əslində sənə uyan azğınlardan savayı, bəndələrimin üstündə sənin heç bir hakimiyyətin yoxdur".

Və doğrudan da onların hamısının və'də yeri cəhənnəmdir.

(Bir cəhənnəm ki,) onun yeddi qapısı var, hər qapıdan onların müəyyən bir dəstəsi (daxil olar).

Şübhəsiz ki, təqvalılar bağlarda və bulaqlardadırlar.

(Onlara deyilər ki): "Sağ-salamat və əmin-amanlıqla daxil olun!"

Və onların ürəklərindəki kin-küdurəti silib atdıq. Onlar qardaş kimi taxtlar üstündə üz-üzə əyləşərlər.

Onlara orada heç bir inciklik üz verməz və onlar oradan çıxarılan deyillər.

Bəndələrimə xəbər ver ki, həqiqətən, bağışlayan və mehriban mənəm.

Və həqiqətən, mənim əzabım çox ağrılı əzabdır.

Və İbrahimin qonaqlarından onlara xəbər ver!

O zaman onlar onun (hüzuruna) daxil olub ona "salam" dedilər. (İbrahim) dedi: "Biz sizdən qorxuruq".

Dedilər: "Qorxma! Biz sənə çox bilici bir oğlanı muştuluq veririk".

Dedi: "Qocalıq mənə toxunduğu bir vaxtda mənə muştuluq verirsinizmi?" Mənə necə muştuluq verirsiniz?

Dedilər: "Biz sənə haqq olaraq bəşarət veririk. Ümidsizlərdən olma!"

Dedi: "Azğınlardan başqa kimdir ki, Rəbbinin rəhmətindən ümidini üzsün".

(Sonra) dedi: "Ey mələklər! Daha sözünüz nədir?"

Dedilər: "Biz günahkar bir qövm üçün göndərilmişik".

"Lut ailəsi müstəsnadır, çünki biz, həqiqətən, onların hamısına nicat verǝnik".

"Arvadından savayı ki, onun əzaba düçar olanlardan olacağını qərara aldıq".

Mələklər Lutun ailəsinə tərəf gəldikdə.

(Lut) dedi: "Siz yad adamlarsınız".

Dedilər: "(Yox) biz sənə onların şübhə etdikləri şeyi (əzabı) gətirmişik".

"Vǝ haqqı sənə gətirmişik, həqiqətən, biz doğru danışanıq".

"Gecənin bir vaxtı ailəni yola sal və (özün də) onların arxasınca yollan və sizdən heç biriniz arxaya dönməməlidir və sizə əmr olunan yerə gedin!"

Və onu bu işdən agah etdik ki, bunların kökü ertə ikən kəsilməlidir.

Və şəhər əhli bir-birinə muştuluq verdikləri halda gəldilər.

(Lut) dedi: "Bunlar mənim qonaqlarımdır, məni rusvay etməyin!"

"Allahdan qorxun və məni xar etməyin!"

Dedilər: "Məgər biz səni yad adamları (qonaq etməkdən) çəkindirməmişdik?"

Dedi: "Əgər (evlənmək) istəyirsiniz, bunlar mənim qızlarımdır, (onlarla evlənin)".

Sənin canına and olsun, onlar öz çal-çağırlarında batıb qaldılar.

Nəhayət, günəş çıxarkən (ölümcül) bir gurultu onları yaxaladı.

Biz o (şəhəri) alt-üst etdik və üstlərinə (cəhənnəm odunda) bişmiş daşlar yağdırdıq.

Həqiqətən, bunda huşlu-başlılar üçün ibrətlər vardır.

Və o şəhə(rin xarabalıqları) yol üstündə hələ də durmaqdadır.

Şübhəsiz ki, bunda mö'minlər üçün ibrətlər vardır.

Və doğrudan da "Əykǝ" əhli zalım idi.

Nəhayət, onlardan intiqam aldıq. Hər iki (şəhərin xarabalıq)-ları aşkarca yol üstündədir.

Vǝ "Hicr ǝhli" (də) peyğəmbərləri inkar etdi.

Öz ayələrimizi onlara verdik, onlar isə ondan üz çevirdilər.

Dağdan özləri üçün evlər yonurdular ki, amanda qalsınlar.

Nəhayət, ertəkən (ölümcül) bir gurultu onları yaxaladı.

Və ələ gətirdikləri şeylər karlarına gəlmədi.

Biz göyləri, yeri və onların arasında olan hər şeyi ancaq haqla yaratdıq. Şübhəsiz ki, qiyamət mütləq gələcəkdir. (Ya Muhəmməd!) Sən (müşriklərdən) gözəl bir şəkildə (ağalıqla) üz döndər.

Həqiqətən, sənin Rəbbin, O yaradan və biləndir.

Doğrudan da sənə qoşa yeddini (Fatihə surəsini) və böyük olan (bu) Qur'anı əta etdik.

Və onların (o kafirlərin) bə'zi dəstələrinə verdiyimizə göz dikmə, onlar(ın iman gətirmədikləri) üçün qəm yemə və öz qanadlarını mö'minlərin üstünə aç.

Vǝ de: "Mən həqiqətən, açıq-aşkar bir xəbərdarlıq verənǝm".

Necə ki, bölənlərə (əzabı) nazil etdik.

Onlar Qur'anı hissələrə bölənlərdir.

And olsun Rəbbinə ki, onların hamısından mütləq soruşacağıq.

Etdikləri əməllərdən.

Sənə əmr olunanı aşkar et və müşriklərdən üz çevir.

Ki, Biz səni istehza edənlərin (şərindən) saxlayarıq.

O kəslər(in şərindən) ki, Allaha ayrı bir tanrı şərik qoşdular. Onlar yaxın zamanda biləcəklər.

Biz bilirik ki, doğrudan da sənin ürəyin onların dediklərindən darıxır.

Rəbbinə həmd etməklə təsbih de və səcdə edənlərdən ol!

Və ölüm gəlib çatınca Rəbbinə ibadət et!