İnsanların hesab vaxtı lap yaxınlaşmışdır, halbuki onlar hələ də üz döndərmiş və qəflətdədirlər.

Rəblərindən onlara elə bir təzə xəbərdarlıq gəlməz ki, onu eşitdikdə məsxǝrǝyǝ qoymasınlar.

Bir halda ki, ürəkləri qafildir. Zülmkarlar öz aralarında gizlincə pıçıldaşıb (deyərlər): "Məgər bu (şəxs) sizin kimi adi bir insan deyilmi? (Belə olan halda) bilə-bilə sehrə inanırsınızmı?"

(Peyğəmbər) dedi: "Mənim Rəbbim göydəki və yerdəki hər sözü bilir. O, həqiqətən, eşidən və biləndir".

Onlar isə dedilər: "Qarma-qarışıq yuxulardır; yox, hətta onu özü uydurmuşdur, xeyr, o bir şairdir. Əvvəlki (peyğəmbərlərin) göndərildiyi kimi o da bizə bir mö'cüzə gətirsin görǝk".

Onlardan qabaq həlak etdiyimiz heç bir şəhərin əhalisi iman gətirmədi. Bunlarmı (mö'cüzəyə) iman gətirəcəklər?!

(Ya Muhəmməd) Biz səndən qabaq da özlərinə vəhy etdiyimiz kişilərdən başqasını göndərmədik. Əgər bilmirsinizsə, zikr əhlindən (əhli-kitabdan) soruşun!

Onları tǝam yeməyən bir heykəl yaratmadıq. Onlar əbədi də deyildirlər.

Sonra onlara verdiyimiz və'dəni yerinə yetirdik. Onlara və istədiyimiz kəslərə nicat verdik. Həddi aşanları isə həlak etdik.

Həqiqətən, sizə bir kitab nazil etdik ki, sizin anılmanız (yaxşılıqla yad olmanız) ondadır. Heç başa düşmürsünüzmü?

Biz zalım olan bir çox şəhərlərin (əhalisini) məhv etdik və onlardan sonra ayrı qövm yaratdıq.

Bizim əzabımızı hiss edən kimi ondan sür'ətlə qaçırdılar.

(Onlara deyilər ki:) "Qaçmayın! Kef çəkdiyiniz ev-eşiklərinizə qayıdın! Ola bilsin ki, sorğu-sual ediləsiniz".

Dedilər: "Vay olsun bizə! Biz, həqiqətən, zalım kimsələrmişik".

Bu onların daimi sözləri idi ki, nəhayət, Biz onları biçilib tökülmüş ot kimi və sönmüş od kimi etdik.

Biz göyü, yeri və onların arasında olanları oyun-oyuncaq yaratmadıq.

Əgər oyun-oyuncaq etmək istəsəydik, öz yanımızdan (bunu) edərdik. Biz isə bunu edən deyilik.

Əksinə, haqqı batilə çırparıq, nəticədə (haqq) batili darmadağın edər və dərhal (batil) məhv olub gedər. (Allaha) mənsub etdiyiniz sifətlərdən ötrü vay olsun sizə!

Göylərdə və yerdə kim vardırsa, Allahındır. Onun yanındakılar ona ibadət etməkdə təkəbbürlülük göstərməzlər və yorulmaq bilməzlər.

Gecə-gündüz durmadan (Onu) təsbih edirlər.

(Yoxsa müşriklər) özləri üçün yerdən elə bir tanrı qəbul etdilər ki, onlar (ölüləri) dirildəcəklər?

Əgər onlarda (yerdə və göylərdə) Allahdan başqa tanrılar olsaydı, (yer-göy) dağılardı. Ərşin Rəbbi olan Allah onların vəsf etdiklərindən pakdır.

Allah etdiyi (heç bir) əməldən ötrü sual olunmaz. Amma onlar (insanlar) (bütün etdiklərindən) sual olunarlar.

Yoxsa Allahdan başqa tanrılar qəbul etdilər? De: "Dəlilinizi gətirin! Bu mənimlə bərabər olanların zikri (öyud- nəsihəti)-dir və məndən qabaqkıların zikridir". Amma çoxları haqqı tanımırlar və nəticədə ondan üz döndərirlər.

Səndən əvvəl heç bir peyğəmbər göndərmədik ki, ona: "Allahdan başqa heç bir tanrı yoxdur, buna görə də Mənə ibadət edin!" -deyə vəhy etməyək.

Və dedilər: "Rəhman [Allah] özünə övlad götürüb! O pakdır. (Dedikləri mələklər isə övlad deyil,) möhtərəm qullardırlar".-

Ki, bir söz söyləməkdə Ondan qabağa düşməzlər və özləri də məhz Onun əmri ilə əməl edərlər.

Allah onların keçmişlərini və gələcəklərini bilir. Onlar təkcə Allahın razı olduğu kimsələrə şəfaət edərlər və Onun qorxusundan titrəyərlər.

Onlardan hər kəs desǝ ki: "Tanrı Allah deyil, mənəm!" Onu cəhənnəmlə cəzalandırarıq. Bəli! Biz zülmkarlara belə çəza verərik.

Məgər kafirlər bilmirlər ki: "Göylər və yer (bir zamanlar) bitişik idi. Biz onları bir-birindən ayırdıq (və ya göylər va yer bir zamanlar bağlı idi, Biz onları açdıq) və hər bir canlını sudan yaratdıq? Görəsən bununla belə iman gətirmirlərmi?"

Və yerdə sabit dağlar yaratdıq ki, (yer) onları (insanları) silkələməsin və orada geniş yollar qoyduq ki, məqsədlərinə çata bilsinlər (və ya hidayət tapa bilsinlər).

Və göyü qorunub-saxlanılan bir tavan etdik. Amma onlar (kafirlər) o (yer-göy) ayətlərindən üz döndərirlər.

Gecəni və gündüzü, günəşi və ayı yaradan Odur. Onların hər birisi (müəyyən) bir fələkdə üzürlər.

Səndən qabaq da heç bir bəşərə əbədi həyat vermədik. Belə olan halda, sən ölsən, onlar dirimi qalacaqlar?

Hamı ölümü dadacaqdır. Yoxlamaq üçün Biz sizi şərlə və xeyirlə imtahan edərik və Bizə tərəf qaytarılacaqsıniz.

Kafirlər səni gördükləri zaman ancaq məsxǝrǝyǝ qoyaraq: "Sizin tanrılarınıza lağ edən budurmu?" deyərlər. Halbuki onların özləri Rəhman (Allahın) zikrini inkar edirlər.

İnsan (sanki) tələsmək (cövhərindən) yaradılmışdır. Tezliklə ayətlərimi (dünya və axirət əzablarını) sizə göstərəcəyəm. Buna görə məni tələsdirməyin!

Və deyirlər: "Əgər düz deyirsinizsə, bəs bu və'də nə zaman olacaqdır?"

Kaş kafirlər odu üzlərindən və arxalarından qaytara bilməyəcəkləri və onlara heç bir kömək olunmayacağı vaxtı biləydilər!

(Əzab) onlara gözlənilmədən gələcək və onları dəhşətə salacaq. (O halda) onu nə özlərindən qaytara biləcəklər, nə də ki, onlara möhlət veriləcəkdir.

Səndən qabaqkı peyğəmbərlər də istehza edildilər. Nəhayət, istehza edənlərə məsxǝrǝyǝ qoyduqları şeyin özü gəlib çatdı.

De: "Sizi gecə və gündüz Rəhman (Allahın əzabından) kim qurtarır?" Amma onlar rəblərinin zikrindən üz döndərirlər.

Yoxsa onları bizim əzabımızdan qoruyan tanrılarmı var?! O tanrılar ki, nə özlərinə yardım edə bilərlər, nə də Bizim tərəfimizdən bir köməklik görərlər.

Biz bunlara və atalarına o qədər gün-güzəran verdik ki, ömürləri uzun oldu. Məgər görmürlər ki, Biz gəlirik və (küfr) torpağının ətəklərini qısaldırıq (və islamı genişləndiririk), belə olan halda, görəsən onlar qalibdirlərmi?

De: "Mən sizi ancaq vəhy ilə xəbərdarlıq edirəm. (Amma) karlar xəbərdarlıq edildikləri zaman çağırışı eşitməzlər".

Əgər Rəbbinin əzabından az bir miqdar onlara yetişsə, deyəcəklər: "Vay olsun bizə! Biz zalım kimsələr imişik".

Qiyamət günü üçün ədalət tərəzisini qurarıq. Heç kəsə əsla haqsızlıq edilməz. Əgər (əməl) bir xərdəl dənəsi ağırlığında olsa belə (hesaba) gətirərik. Hesab-kitab görməyə Biz yetərliyik.

Biz Musa və Haruna (haqq-batili) ayırd edən (Tövrat) verdik və pərhizkarlar üçün işıqlıq və öyüd-nəsihət verdik.

Onlar o kimsələrdirlər ki, gizlində rəblərindən qorxurlar və qiyamətdən vahimə edirlər.

Nazil etdiyimiz bu (kitab) mübarək bir öyüd-nəsihətdir. Bununla belə, yenə onu inkar edirsinizmi?

Biz bundan əvvəl İbrahimə də doğru yolu verdik və onun (buna layiq olduğunu) bilirdik.

(İbrahim) atasına və qövmünə: “Bu surətlər (heykəllər) ki, onlara ibadət edirsiniz, nədir?” -dediyi zaman

Onlar dedilər: “Biz atalarımızı onlara ibadət edən gördük”.

Dedi: "Doğrudan da siz və atalarınız açıq-aşkar bir zəlalətdəsiniz".

Dedilər: “Sən ciddi olaraq bizə (bu sözləri) gətirmişsən, yoxsa zarafat edənlərdənsən?”

Dedi: “Xeyr, Rəbbiniz göylərin və yerin Rəbbidir ki, onları yaratmışdır və mən buna şahidlik edənlərdənəm”.

“Vǝ and olsun Allaha! Siz dönüb getdikdən sonra bütləriniz barəsində bir tədbir görəcəyəm”.

Sonra böyük (bütdən) başqa onları parça-parça elədi ki, bəlkə onun başına qayıtdılar.

Dedilər: “Bizim tanrılarımızın (başına) kim bu işi gətirmişsə, şübhəsiz ki, o zülmkarlardandır”.

Dedilər: “İbrahim deyilən bir cavandan onları pislədiyini eşitmişik”.

Dedilər: “Onda bəs onu camaatın gözlərinin qabağına gətirin ki, bəlkə onlar şahid oldular”.

Dedilər: “Ey İbrahim! Bizim tanrılarımızı sənmi bu günə salmışsan?”

Dedi: “(Yox.) Bəlkə bunların böyüyü bu işi görmüşdür, Əgər danışa bilirlərsə, onlardan bir soruşun görǝk”.

Özlərinə gəlib (bir-birilərinə) dedilər: “Siz doğrudan da zülmkarlarsınız”.

Sonra başlarını aşağı salıb (dedilər): “Əlbəttə, sən bilirdin ki, bunlar danışan deyillər”.

Dedi: "Siz Allahı qoyub sizə heç bir xeyir və zərər verə bilməyən şeylərəmi ibadət edirsiniz?"

“Vay olsun sizə və Allahdan başqa ibadət etdiyiniz şeylǝrǝ! Əcəba! Başa düşmürsünüzmü?"

Dedilər: “Əgər bir iş görəcəksinizsə, onu odlayın və tanrılarınıza kömək edin".

Dedik: “Ey od! İbrahim üçün sərin və ziyansız ol!”

Onlar (İbrahimə) qurğu qurmaq istədilər, lakin biz onları daha çox ziyana uğrayan etdik.

Onu və Lutu qurtarıb, aləmlərə mübarək etdiyimiz yerə çatdırdıq.

Və İshaqı ona əta etdik, Yəqubu da üstəlik verdik və hamısını saleh şəxslər etdik.

Biz onları əmrimizlə hidayət edən imamlar etdik. Biz onlara xeyirli işlər görməyi, namaz qılmağı və zəkat verməyi vəhy etdik və onlar ancaq Bizə ibadət edən idilər.

Biz Luta peyğəmbərlik və elm verdik, onu (əhli) çirkin işlər görən bir şəhərdən qurtardıq, həqiqətən, onlar pis və fasiq qövm idilər.

Və onu öz rəhmətimizə daxil etdik. Həqiqətən, o, salehlərdən idi.

Nuhu da yad et ki, o, daha öncə nida etdi, Biz isə onun (nidasına) cavab verdik, onu ailəsi ilə birlikdə böyük (ürəyə işləyən) qəmdən qurtardıq.

Biz ona ayələrimizi inkar edən qövmün bərabərində kömək etdik. Həqiqətən, onlar pis bir qövm idilər, ona görə də onların hamısını suda boğduq.

Davudu və Süleymanı da yad et! O zaman onlar bir qövmün qoyunlarının gecə xaraba qoyduqları bir ǝkin yeri haqqında hökm verirdilər, Biz də onların hökmünə şahid idik.

Biz Süleymanı başa saldıq və onların hər ikisinə hikmət və bilik verdik. Biz dağları və quşları Davud ilə birlikdə təsbih etməyə vadar etdik. Bunları edən Biz idik.

Vǝ (Davuda) vuruşunuzda sizi qorumaq üçün zireh (toxumaq) sənətini öyrətdik. Siz şükr edənsinizmi?

Süleymana, bərəkətli etdiyimiz yerə tərəf, onun əmrilə şiddətlə əsən küləyi də ram etdik. Hər şeyi bilən Bizik.

Və şeytanlardan bə'zisi onun üçün üzgüçülük (qəvvaslıq) edirdilər və başqa işlər də görürdülər. Biz isə onları gözləyirdik.

Və Əyyubu da (yada sal) bir zaman o, Rəbbini çağırdı ki: “(Pərvərdigara) mənə zərər toxunmuşdur və sən ərhəmər-rahiminsən”.

Biz də onun duasını qəbul etdik, onda olan zərəri götürdük, Öz yanımızdan bir rəhmət olaraq, ibadət edənlərə bir ibrət olmaq üçün həm ailəsini, həm də onlarla birlikdə bir o qədərini də ona verdik.

Və İsmail, İdris və Zül-kifli də (yad et) ki, hamısı səbr edənlərdən idilər.

Və onları Öz rəhmətimizə daxil etdik. Həqiqətən, onlar salehlərdən idilər.

Və Zün-nunu (balıq yoldaşını) yad et. O zaman ki, acıqlanıb getdi və belə (bildi ki,) Biz əsla onu təngişdirməyəcəyik. Nəhayət, qaranlıqlar içərisində nida etdi ki: “Səndən başqa bir Allah yoxdur. Sən paksan. Mən, həqiqətən, zülmkarlardan imişəm”.

Onun (duasını) qəbul etdik və onu qəmdən qurtardıq. Biz mö'minləri də belə qurtararıq.

Və "Zəkəriyyanı (yad et!) O zaman ki, Pərvərdigarını çağırıb dedi: “Pərvərdigara! Məni yalqız buraxma, sən varislərin daha yaxşısısan”.

Onun da duasını qəbul etdik, Yəhyanı ona ehsan etdik və arvadını onun üçün (doğmağa) qabil etdik. Həqiqətən, onlar xeyir işlər görməyə tələsirdilər (yarışırdılar). Bizə rəğbət və qorxu üzündən ibadət edirdilər və Bizim üçün təvazökar idilər.

Bir də o (qadını yad et) ki, özünü pak saxladı. Öz ruhumuzdan ona üfürdük, onu və oğlunu aləmlər üçün bir ayət etdik.

Həqiqətən, parçalanmayan yeganə bir ümmət, təkcə sizin bu ümmətdir və sizin Rəbbiniz Mənəm, belə olduqda Mənə ibadət edin!

Amma (ayrıları) dinlərini öz aralarında bölük-bölük etdilər. Hamısı Bizə tərəf qayıdandırlar.

Hər kəs mö'min olaraq saleh əməllərdən etsə, onun əməli zay olmayacaqdır. Həqiqətən, Biz onun üçün yazırıq.

Və həlak etdiyimiz şəhər (əhalisinin rəc'ətdə dünyaya) qayıtmaları mahaldır (qeyri-mümkündür).

"Yǝ'cuc" və "Mə'cuc" (səddi) açılıb, onların hər dərə-təpədən sür'ətlə (məhşərə) axışdıqları zamana qǝdər.

Və haqq olaraq və'də yaxınlaşar. Onda kafirlərin gözləri bərəlib (deyərlər): “Vay olsun bizə ki, bu (gündən) qafil idik. Yox, biz zalım imişik”.

Həqiqətən, siz və Allahdan qeyri ibadət etdikləriniz cəhənnəm alışıqlarısınız. Siz oraya daxil olacaqsınız.

Əgər bunlar həqiqi (Allah) olsaydılar, oraya daxil olmazdılar. Halbuki hamılıqla orada daimi qalandırlar.

Orada onlara (ǝzabdan) bir inilti (xırıltı) var. Və onlar orada heç bir (sevindirici) şey eşitməzlər.

Şübhəsiz ki, qabaqcadan bizim tərəfimizdən özlərinə gözəl və'də verilən şəxslər ondan (cəhənnəmdən) uzaq saxlanılacaqlar.

Onlar onun (cəhənnəmin) uğultusunu belə, eşitməzlər. Onlar ürəkləri istəyən ne'mətlər içində daimi qalacaqlar.

(Qiyamətin) lap böyük qorxusu (belə) onları kədərləndirməz. Mələklər yaxşıca onların qabaqlarına çıxıb: “Bu, sizə və'də verilən gündür”,- (deyərlər).

O gün yazı kağızını (səhifəsini) bürmələyən kimi göyü bürmələyəcəyik. (Dünyanı) ilk dəfə yaratmağa başladığımız kimi təzədən yaradarıq. Bu Bizim öhdəmizə olan bir vədədir ki, Biz onu yerinə yetirǝnik.

Biz "Tövrat"dan əlavə, "Zǝbur"da da yazmışıq ki, həqiqətən, yer üzünə saleh bəndələr varis olacaqlar.

Həqiqətən, bunda ibadət edən bir qövm üçün yetərli ibrətlər vardır.

Səni aləmlərə ancaq bir rəhmət olaraq göndərdik.

(Ya Muhəmməd!) De: “Həqiqǝtən, mənə vəhy olur ki, sizin tanrınız yeganə olan vahid Allahdır. İndi müsəlman olursunuzmu?”

Əgər üz döndərsələr de: “Sizə olduğu kimi bildirdim. Bilmirəm ki, sizə və'də verilən şey yaxındırmı, yoxsa uzaq?”

Şübhəsiz ki, O, aşkar sözü də bilir, sizin gizlətdiklərinizi də bilir.

Və bilmirəm, bəlkə də sizi imtahana çəkmək və bir müddət daha sizə güzəran vermək üçündür.

Dedi: “Pərvərdigara! Sən özün haqq ilə hökm et! Vəsf etdiyinizə rəğmən bizim Rəbbimiz rəhm edən və kömək edəndir”.