Allahın əmri gəlib çatdı. Ona tələsməyin! O, onların şərik qoşduqlarından pak və ucadır.

Mələkləri öz əmrindən (olan) ruhla (vəhy ilə) öz bəndələrindən istədiyinə nazil edər (və deyər:): "Xəbərdarlıq edin ki, Məndən qeyri bir tanrı yoxdur, məndən qorxun!"

Göyləri və yeri haqq olaraq yaratdı. O, onların şərik qoşduqlarından ucadır.

İnsanı bir nütfədən yaratdı. Bununla belə, o yenə aşkar mücadilə edəndir.

Və dördayaqlıları sizin üçün yaratdı. Bunlarda sizlərə (istilik üçün) paltar və ayrı mənfəətlər vardır (həm də) onlardan yeyirsiniz.

Və onları (axşamçağı) otarmaqdan qaytaranda (səhǝrçağı) otarmağa aparanda, sizin üçün onlarda bir gözəllik vardır.

Onlar sizin yüklərinizi, özünüzü çətinliyə salmadan apara bilmədiyinizi şəhərə daşıyırlar. Həqiqətən, sizin Rəbbiniz şəfqətli və mehribandır.

Sizin minməyiniz üçün və (sizə) bəzək olmaq üçün atı, qatırı və uzunqulağı (yaratdı). Həm də sizin bilmədiyiniz şeyləri yaradır.

Doğru yolu göstərmək Allaha aiddir və o (yollardan) əyrisi də vardır. (Allah) istəsəydi, sizi hamılıqca zorla (doğru yola) hidayət edərdi.

Göydən sizin üçün su endirən Odur. İçiləcək (su) Ondandır, və (sürülərinizi) otardığınız çəmənliklər də Ondandır.

(Allah) onunla sizin üçün əkin, zeytun, xurma, üzüm və bütün meyvələrin (ağaclarını) bitirir. Doğrudan da bunda düşünən qövm üçün böyük bir ayət vardır.

Gecəni, gündüzü, günəşi və ayı sizin üçün ram etmişdir. Və ulduzlar da onun əmrinə tabedir. Doğrudan da bunda başa düşən qövm üçün ayətlər vardır.

Və yer üzündə sizin üçün yaratdığı rəngarəng şeyləri də (sizin ixtiyarınıza verdi). Doğrudan da bunda ibrət alan qövm üçün böyük bir ayət vardır.

Təzə ət yeməyiniz üçün və geydiyiniz bəzək şeylərini çıxartmağınız üçün dənizi sizə ram edən Odur. Və Onun fəzl-kərəmindən ruzi axtarmağınız üçün gəmilərin (suyu) yara-yara getdiyini görürsən. Ola bilsin ki, şükr edəsiniz.

Və yer üzündə möhkəm dağlar saldı ki, sizi yırğalandırmasın. Çaylar və yollar yaratdı ki, öz yolunuzu tapasınız.

Və əlamətlər (da yaratmışdır) ki, onlar yollarını ulduz vasitəsilə taparlar.

Yaradan şəxs yaratmayan şəxs kimidirmi? Heç ibrət almırsınızmı?

Allahın ne'mətlərini saymaq istəsəniz, onu saya bilməzsiniz. Həqiqətən, Allah bağışlayan və mehribandır.

Allah sizin gizlətdiyiniz və aşkar etdiyiniz hər şeyi bilir.

(Müşriklərin) Allahdan qeyri çağırdıqları (ibadət etdikləri) kəslər heç bir şeyi yarada bilməzlər, çünki özləri yaradılmışlar.

Onlar ölüdürlər, diri deyillər və nə vaxt diriləcəklərini də bilmirlər.

Sizin tanrınız, vahid bir tanrıdır. Axirətə iman gətirməyənlərin ürəkləri (haqqı) inkar edəndir və onlar təkəbbürlülük edəndirlər.

Şübhəsiz ki, Allah, həqiqətən, onların gizlətdiklərini və aşkar etdiklərini bilir. O, həqiqətən, təkəbbürlülük edənləri dost tutmaz.

Onlara: "Rəbbiniz nə nazil etmişdir?" - deyildiyi zaman deyirlər: "Əvvəlkilərin (qədimkilərin) əfsanələrini!"

(Nəhayət, bununla) qiyamət günü öz günahlarına tamamilə, (həm də) nadanlıqları üzündən yoldan çıxartdıqları kimsələrin günahlarının bir qisminə yüklənsinlər. Bir görün onların daşıdıqları yük necə də pisdir!

Onlardan qabaqkılar da qurğu qurdular, (amma) Allah onların evlərini təməldən yıxdı. Nəticədə tavanları başlarına töküldü. Və əzab onlara özləri başa düşmədikləri bir tərəfdən gəldi.

Sonra qiyamət günü onları rüsvay edər və deyər: "Barələrində (peyğəmbərlərlə) münaqişə etdiyiniz şəriklərim hardadır?" Özlərinə elm verilmiş olanlar deyəcəklər: "Həqiqətən, bugünkü rusvayçılıq və pislik kafirlər üçündür".

Özlərinə zülm etmiş olanların canlarını mələklər aldıqları zaman təslim olub (deyərlər): "Biz heç bir pislik etmirdik". Xeyr! Allah, həqiqətən, sizin nələr etmiş olduğunuzu yaxşı biləndir.

İndi cəhənnəmin qapılarından girin! Orada əbədi qalansınız. Doğrudan da təkəbbürlülərin yeri nə yaman pisdir.

Təqvalı olan şəxslərə deyilər: "Rəbbiniz nə nazil etmişdir?" Deyərlər: "Yaxşılıq". Yaxşılıq edən şəxslər üçün bu dünyada yaxşılıq vardır və doğrudan da axirət evi daha yaxşıdır. Və təqvalıların yurdu (evi) necə də gözəldir.

O daxil olacaqları yer, ədən cənnətləridir ki, altından arxlar axar. Onlar üçün orada istədikləri hər şey vardır. Allah təqvalıları belə mükafatlandırar.

Mələklər pak olduqları halda canlarını aldıqda deyərlər: "Salam olsun sizə! Etmiş olduğunuz əməllərə görə cənnətə daxil olun!"

(Kafirlər can alan) mələklərin onlara tǝrǝf gəlmələrindən, yaxud sənin Rəbbinin əmri (əzabı) onlara gəlməsindən başqa bir şeyi gözləyirlərmi? Onlardan qabaqkılar da belə etdilər. Allah onlara zülm etmədi, lakin onlar özləri-özlərinə zülm edirdilər.

Etdikləri öz pisliklərinin cəzası onlara yetişdi. Və istehza etdikləri (əzab) onları yaxaladı (onları haqladı).

Şərik qoşanlar dedilər: "Əgər Allah istəsəydi, nə biz, nə də atalarımız ondan başqa heç bir şeyə ibadət etməzdik, Onsuz (Onun hökmü olmadan) heç bir şeyi haram etməzdik". Onlardan qabaqkılar (da) belə etdilər, peyğəmbərlərin öhdəsində isə açıq-aşkar təbliğdən başqa bir şey vardırmı?

Həqiqətən, Biz hər ümmətə peyğəmbər göndərdik (ki, desin): "Allaha ibadət edin, tağutdan çəkinin!" Onlardan bir qismini Allah hidayət etdi, bir qismi də azmalı oldular. Yer üzündə dolanıb görün ki, təkzib edənlərin aqibəti necə oldu?!

Sən onların hidayət olunmasını nə qədər istəsən də, Allah zəlalətdə buraxdığı kimsəni hidayət etməz və onlar üçün kömək edənlər yoxdur.

Onlar bütün gücləri ilə Allaha and içdilər ki: "Allah ölən şəxsi diriltməyəcəkdir". Yox! Bu və'də Onun üçün haqdır. Və lakin insanların çoxu bilmir.

(Dirildəcək ki,) ixtilafda olduqları məsələləri onlara açıb-aydınlaşdırsın və kafir olanlar da özlərinin yalançı olduqlarını bilsinlər.

Biz hər hansı bir şeyi istədikdə ona ancaq "Ol!" - deyərik. O da dərhal olar.

Zülmə mə'ruz qaldıqdan sonra Allah yolunda hicrət edənlərə bu dünyada gözəl bir yerdə yəqin ki, daldanacaq verərik. Amma bilmiş olsalar, axirət ǝcri daha böyükdür.

Onlar səbr edənlər və rəblərinə təvəkkül edənlərdir.

(Ya Muhəmməd!) Biz səndən qabaq da özlərinə vəhy etdiyimiz kişilərdən başqasını göndərmədik. Əgər bilmirsiniz, zikr əhlindən (əhli-kitabdan) soruşun.

(Ona görə ki, onları) açıq-aydın dəlillərlə və yazılarla (göndərdik), bu Qur'anı da sənə nazil etdik ki, insanlar üçün onlara göndəriləni aydınlaşdırasan, ola bilsin ki, onlar düşünsünlər.

Pis (məqsədlərlə) qurğu quranlar Allahın onları yerǝ batırmasından və ya bilmədikləri bir yerdən əzabın gəlib onları (yaxalamasından) amandadırlarmı?!

Və ya gəzib dolanarkən (əzabın) onları yaxalamasından (qorxmurlarmı?) Onların qaçacaqları bir yer yoxdur.

Ya onları qorxu halında yaxalamasından (əmindirlər?) Doğrudan da sizin Rəbbiniz şəfqətlidir və mehribandır.

Məgər onlar Allahın yaratdığı hər hansı bir şeyə baxıb görmürlər ki, onların kölgələri Allaha acizanə bir surətdə sağa-sola ǝyilib səcdə edirlər.

Göylərdə və yerdə olan bütün canlılar və mələklər də heç bir təkəbbürlülük göstərmədən Allaha səcdə edirlər.

Onlar özlərinə hakim olan rəblərindən qorxar və özlərinə əmr olunanları yerinə yetirərlər.

Və Allah buyurdu: "İki tanrı qəbul etməyin! O, ancaq vahid bir tanrıdır. İndi isə məhz Məndən qorxun!"

Göylərdə və yerdə nə varsa, hamısı Onundur. Xalis din (mütləq itaət) Onundur. Allahdan qeyri bir kəsdən qorxursunuzmu?

Hər nǝ ne'mətiniz varsa, Allahdandır. Sonra sizə bir sıxıntı üz verəndə (də) Ona yalvarıb yaxarırsınız.

Sonra sizi o sıxıntıdan qurtardıqda, onda (görərsən ki,) aranızdan bir dəstə rəblərinə şərik qoşurlar!

(Qoy) onlara verdiyimiz şeylərə naşükürlük etsinlər. Hələ kef çəkin (görək, amma) tezliklə biləcəksiniz.

Onlar verdiyimiz ruzidən bilmədikləri bir şeylǝrǝ (bütlǝrǝ) pay ayırırlar. Allaha and olsun ki, yaxdığınız iftiralara görə mütləq sorğu-suala çəkiləcəksiniz.

Və Allaha qızlar isnad etdilər. O pakdır. Özlərinə isə istədiklərini (oğlan uşaqlarını götürürdülər).

Onlardan birinə qızı olması ilə bağlı muştuluq verildikdə acığını udaraq üzü qaralar.

Verilən muştuluğun pisliyindən öz qövmündən qaçıb gizlənər. (Bilməz ki,) onu zillətlə saxlasın, yoxsa torpağa quyulasın? Bax gör necə pis hökm edirlər.

Pis məsəl axirətə iman gətirməyənlərə, yaxşı məsəl isə Allaha məxsusdur. O, izzət və hikmət sahibidir.

Və əgər Allah insanları zülmlərinə görə (əzaba) düçar etsəydi, yer üzündə heç bir canlını buraxmazdı (diri qoymazdı). Lakin onların (cəzasını) bəlli bir vaxta qədər tə'xirə salır. Əcəlləri gəlib çatdıqa isə nə bir saat dala qalarlar, nə (bir saat) qabağa keçərlər.

Özləri xoşlamadıqlarını Allaha mənsub edirlər və dilləri yalandan söylər ki: "Gözəl aqibət onların özləri üçündür!" Şübhəsiz ki, onlar üçün od (cəhənnəm) vardır və (sür'ətlə) oraya sürüklənəcəklər.

Allaha and olsun ki, (Ya Muhəmməd!) səndən qabaqkı ümmətlərə (peyğəmbərlər) göndərdik. (Lakin) şeytan onlara (çirkin) əməllərini bəzəkli göstərdi və bu gün (də) o, onların mövlasıdır və onlar üçün ağrılı əzab vardır.

Və Biz (bu) kitabı sənə ancaq haqqında ixtilafa düşdükləri şeyi onlara açıqlamağın üçün və iman gətirən kimsələrə hidayət və rəhmət olsun - deyə nazil etdik.

Və Allah göydən bir su göndərdi, onunla yer üzünü öləndən sonra diriltdi. Həqiqətən, eşidən kimsələr üçün bunda böyük bir ayət vardır.

Şübhəsiz ki, dördayaqlılarda (dəvə, qaramal, keçi və qoyunda) sizin üçün böyük bir ibrət vardır. Biz onların qarınlarındakı qanla (həzm edilmiş) qida arasından sizə xalis (təmiz) və içənlərə içməsi rahat (güvara) olan süd içirdirik.

Siz xurma və üzüm meyvələrindən şərab, həm də pak ruzi alırsınız, doğrudan da bunda başa düşən qövm üçün böyük bir ayət vardır.

Və sənin Rəbbin bal arısına (belə) ilham etdi: "Dağlarda, ağaclarda və alaçıqlarda (damlarda-pətəklərdə) özünə yuva sal".

"Sonra bütün məhsullardan ye və sonra boyun ǝyǝrǝk Rəbbinin yolunu get!" (O arıların) qarınlarından insanlar üçün şəfa olan müxtəlif rənglərdə bal çıxır. Həqiqətən, bunda (arıların yaşayışında) düşünüb-dərk edən kimsələr üçün (Allahın əzəmətindən) böyük bir ayət vardır.

Və Allah sizi yaratmışdır, sonra sizin ruhunuzu alacaq. Sizdən bir qisminiz ömrün lap rəzil (qocalıq) çağına çatdırılar ki, bildiklərindən heç bir şeyi daha bilməz. Doğrudan da Allah biləndir, qadirdir.

Allah ruzi baxımından bə'zinizi bə'zinizə üstün etmişdir. (Amma ruzi baxımından) üstün olanlar (varlılar) əlləri altında olanlara (qullara) öz ruzilərindən vermirlər ki, bunda bərabər olsunlar. Allahın ne'mətini inkar edirlərmi?

Və Allah sizin üçün özünüzdən zövcələr yaratdı, zövcələrinizdən də sizin üçün oğullar və nəvələr əmələ gətirdi, pak (şeylərdən) sizə ruzi verdi. Belə olan halda yenə də batilə inanıb Allahın ne'mətini inkar edirlərmi?!

Allahı qoyub göylərdən və yerdən onlara bir ruzi verməyə ixtiyarı olmayan və (bir iş görməyə) gücləri çatmayan şeylərə ibadət edirlər.

Allaha (ibadətdə) oxşarlar qoşmayın! Həqiqətən, Allah bilir, siz isə bilmirsiniz.

Allah belə bir məsəl çəkdi: "Heç bir şeyə gücü çatmayan və ayrısının malı olan bir qul ilə verdiyimiz gözəl ruzidən gizlində və aşkarda infaq edən şəxs birdirmi?!" Həmd büsbütün Allaha məxsusdur. Lakin çoxu bilmir.

Və Allah (ayrı bir) məsəl çəkir: "İki kişidən biri dilsizdir (laldır), heç bir şeyə qadir deyil və öz ərbabına bir ağır yükdür. Onu hara yollasa, xeyir gətirməz. O, doğru yolda olub ədalətə əmr edən bir şəxslə birdirmi?"

Göylərin və yerin qeybi Allaha məxsusdur. Qiyamətin qopması bir göz qırpımı çəkər, yaxud ondan da yaxındır. Həqiqətən, Allah hər şeyə qadirdir.

Allah sizi analarınızın bətnindən heç bir şey bilmədiyiniz halda çıxartdı. Sizə qulaq, göz və qəlb verdi ki, bəlkə şükr edəsiniz.

Məgər göy üzündə ram olmuş quşları görmürlər? Onları təkcə Allah saxlayır. Həqiqətən, bunda iman gətirənlər üçün bir çox ayətlər vardır.

Və Allah sizin üçün evlərinizdən rahatlıq yerləri yaratdı və heyvan dərilərindən həm köç vaxtı, həm də bir yerdə qaldığınız zaman sizin üçün yüngül evlər (çadırlar) yaratdı, onların yunundan, qəzilindən və tükündən bir vaxta qədər istifadə edəcəyiniz örtüklər və əmtəələr yaratdı.

Və Allah sizə yaratdığı şeylərdən çardaqlar, dağlardan daldalanacaqlar, sizi istidən qoruyan paltarlar, qorxudan (zərərdən) saxlayan yaraqlı geyimlər yaratdı. (Allah) ne'mətini sizə belə tamamladı ki, bəlkə ona təslim olasınız.

(Ya Muhəmməd! Bununla belə) əgər yenə də üz döndərsələr; sənin vəzifən ancaq açıq-aydın təbliğ etməkdir.

Allahın ne'mətini bilir və sonra onu danırlar və çoxu kafirdirlər.

Və qiyamət günü hər ümmətdən bir şahid gətirəcəyik. Sonra kafirlərə izn verilməyəcək, onlardan üzr diləmələri də İstənilməyəcək.

Və zülmkarlar əzabı gördükdə (əzabları) yüngülləşdirilməyəcək və onlara möhlət verilməyəcək.

Müşriklər (qoşduqları) şərikləri gördükdə deyərlər: "Pərvərdigara! Səni qoyub çağırdığımız (ibadət etdiyimiz) şəriklərimiz bunlardır". (Amma) şəriklər də onlara tərəf: "Siz doğrudan da yalançısınız" -deyə söz atarlar.

O gün Allaha təslim olarlar və uydurduqları şeylər də onların (gözlərindən) itib gedər.

Allaha kafir olub Allahın yolundan saxlayanların fəsad törətmiş olduqlarına görə, əzabları üstünə (qat-qat)] əzab artırarıq.

Və qiyamət günü hər ümmətə öz içlərindən bir şahid gətirərik və səni də bu (ümmətə) şahid gətirərik. Hər şeyi açıqlayan (hamıya) hidayət, rəhmət və müsəlmanlar üçün bəşarət (muştuluq) olan bu kitabı sənə nazil etdik.

Həqiqətən, Allah ədalətli olmağı, yaxşılıq etməyi və yaxınlara (qohumlara) (ehtiyaclarını) verməyi əmr edir; fəhşanı, pis işi və zülm etməyi pisləyir. Sizə öyüd-nəsihət verir ki, bəlkə ibrət alasınız.

Əhd-peyman bağladığınız zaman, Allahın əhdinə vəfa edin! Vǝ andlarınızı bərkitdikdən sonra pozmayın! Bir halda ki, Allahı özünüzə şahid tutubsunuz. Həqiqətən, Allah sizin nə etdiklərinizi bilir.

Bir ümmətin, digər bir ümmətdən (say e'tibarilə) çox olması səbəbinə aranızdakı andları qurğu quraraq "möhkəmcə əyirdiyi ipliyini sonradan qıran (didən) qadın kimi" qırmayın! Allah bununla sizi imtahana çəkir. Qiyamət günü də haqqında ixtilaf etdiyiniz şeyləri sizə, əlbəttə, açıqlayacaqdır.

Və əgər Allah istəsəydi, sizi tək bir ümmət edərdi, lakin O, istədiyini zəlalətə buraxar və istədiyini də hidayət edər. Etmiş olduğunuz əməllərə görə, sorğu-suala çəkiləcəksiniz.

Aranızdakı andları qurğuya çevirməyin! Yoxsa ayağınız möhkəm olduqdan sonra sürüşər. (Camaatı) Allah yolundan saxladığınıza görə (dünya) əzabını dadarsınız və sizin üçün (axirətdə) böyük bir əzab da vardır.

Allahla bağladığınız əhdi ucuz satmayın! Doğrudan da əgər biləsiniz, Allahın yanındakı sizin üçün daha yaxşıdır.

Sizin yanınızdakı qurtarıb tükənər, Allahın yanındakı isə həmişə qalandır. Səbr edənlərə etdikləri əməldən daha yaxşısını ǝcr verəcəyik.

Hər kəs kişi olsun, ya qadın, mö'min olduğu halda yaxşı iş görərsə, onu pak yaşayışla yaşadacağıq və şübhəsiz ki, onlara etdikləri əməllərdən daha yaxşısını ǝcr verəcəyik.

Qur'an oxuduğun zaman qovulmuş şeytandan Allaha pənah apar.

Həqiqətən, iman gətirib öz rəblərinə təvəkkül edən şəxslərə onun hakimiyyəti yoxdur.

Onun hakimiyyəti təkcə onu özünə başçı edən və şərik qoşanların üstündədir.

Biz bir ayəni ayrı bir ayənin yeri ilə dəyişsək ki, əlbəttə, Allah nə nazil etdiyini yaxşı bilir: "Sən bir iftiraçısan", - deyərlər. (Yox), onların çoxu bilmirlər.

De: "Onu (Qur'anı) Cəbrail sənin Rəbbin tərəfindən haqq olaraq nazil etmişdir ki, iman gətirənlərin (imanını) sabitləşdirsin və müsəlmanlar üçün hidayət və bǝşarət olsun".

Və yaxşı bilirik ki, onlar deyirlər: "Ona ayrı bir nəfər öyrədir". (Yox! Belə deyil!) bunların istinad etdikləri şəxsin dili tutğun (əcəm) dildir. Bu (Qur'an) isə açıq-aydın ǝrǝb dilidir.

Allahın ayələrinə iman gətirməyənləri, sözsüz ki, Allah hidayət etməz. Və onlar üçün ağrılı bir əzab vardır.

Təkcə Allahın ayələrinə iman gətirməyənlər yalan uydururlar və onlar, həqiqətən, yalançıdırlar.

Qəlb iman ilə sabit olduğu halda (küfrə) məcbur edilən şəxsdən başqa, iman gətirdikdən sonra Allaha kafir olub küfrü xoş qarşılayanlar Allahdan bir qəzəb və onlar üçün böyük bir əzab vardır.

Bu ona görədir ki, onlar dünya həyatını axirətdən üstün tutdular. Doğrudan da Allah kafir kimsələri hidayət etməz.

Bunlar, o kəslərdir ki, Allah onların qəlblərini, qulaqlarını və gözlərini möhürləmişdir, doğrudan da qəflətdədirlər.

Şübhə yoxdur ki, axirətdə ziyana uğrayanlar da onlardır.

Sonra zülmə düçar olduqdan sonra hicrət edən, daha sonra cihad edib səbr edən kimsələr üçün həqiqətən, sənin Rəbbin bu (müsibətlərdən) sonra bağışlayan və mehribandır.

O gün gələr ki, hər kəs özünü müdafiə etməyə başlar (hər kəs öz hayına qalar), hər kəsə etdiyi əməlin əvəzi tamam-kamal verilər və onlara əsla haqsızlıq olmaz.

Allah bir şəhəri məsəl çəkdi ki, o şəhər əmin- amanlıq və arxayınçılıq içində idi. Ruzisi hər yerdən bol-bol gəlirdi. Sonra əhalisi Allahın ne'mətlərinə küfr düşdü, Allah da onlara etdikləri (əməllərə) görə aclıq və qorxu örtüyünə (bürüyüb fəlakət dadını) dadızdırdı.

Şübhəsiz ki, onların öz içindən onlara bir peyğəmbər gəldi, onu isə təkzib etdilər. Nəticədə zalım olduqları halda əzab onları yaxaladı.

İndi Allahın sizə verdiyi halal və pak ruzilərdən yeyin və əgər təkcə Allaha ibadət edirsinizsə onun ne'mətlərinə şükr edin!

(Allah) sizə ancaq murdar (heyvanı), qanı, donuz ətini və Allahdan qeyrisinin adına kəsilən heyvanın ətini haram etmişdir. Bununla belə, hər kəs (onları) yemək məcburiyyətində qalsa ifrat etmədən və həddi aşmadan (onları) yeyə bilər. Şübhəsiz ki, Allah çox bağışlayan və çox rəhimdir.

Dillərinizi yalan deməyə alışdıraraq yalan uydurub deməyin ki: "Bu halaldır, bu da haram". Yoxsa Allaha iftira yaxmış olarsınız. Həqiqətən, Allaha yalan uyduran kimsələr nicat tapmazlar.

(Onlar üçün) azacıq fayda var və (eyni halda) onlar üçün ağrılı əzab da vardır.

Sənə söylədiklərimizi bundan əvvəl yəhudi olanlara da haram etdik; Biz onlara zülm etmədik, lakin özləri-özlərinə zülm etdilər.

(Bununla belə), sənin Rəbbin, bilmədən (cǝhl üzündən) pis iş görən və sonra tövbə edib islah olan kimsələr üçün, doğrudan da çox bağışlayan və mehribandır.

Həqiqətən, İbrahim Allaha itaətkar, haqqa tabe (tək başına) bir millət idi və müşriklərdən deyildi.

Onun ne'mətlərinə şükr edən idi. (Allah) onu seçdi və doğru yola hidayət etdi.

Dünyada ona yaxşılıq verdik və həqiqətən, axirətdə də salehlərdəndir.

Sonra sənə vəhy etdik ki: "Batildən uzaq olub haqqa yönələn İbrahimin dininə tabe ol! (Çünki) o, müşriklərdən deyildi".

Şənbə (hökmü), onun barəsində ixtilaf edənlərə (vacib) edildi və Rəbbin qiyamət günü, ixtilaf etdikləri məsələdə onların arasında hökm verəcəkdir.

Hikmətlə, gözəl öyüd-nəsihətlə öz Rəbbinin yoluna çağır və onlarla ən gözəl şəkildə mübahisə et! Həqiqətən, sənin Rəbbin yolundan azan kimsəyə yaxşı bələddir və O, hidayət tapanları da yaxşı tanıyandır.

Əgər hər halda cəza verəcək olsanız, sizə verilən cəza kimi onları cəzalandırın və əgər səbr etsəniz, bu, səbr edənlər üçün daha xeyirlidir.

Səbr et və sənin səbrin ancaq Allahın köməyi ilədir. Onlar üçün məhzun olma! Və qurduqları qurğulara görə də darıxma!

Həqiqətən, Allah təqvalı olanlar və yaxşılıq edənlərlədir.